World Forestry Day hman a ni

Environment & Forest department huaihawtin Inrinni khan Pachhunga University College compound-ah World Forestry Day hman a ni a, E&F minister Lalrinmawia Ralte-in a hmanpui.

World Forest Day hmanna inkhawm hi PCCF Lal Ramthanga'n a kaihruai a; Lal­rinmawia Ralte chuan, "Ram­ngaw humhalhna hian kan tu leh fate hnuk a khawih tak meuh a ni. Rual û zawk leh pi leh pute'n ngaih pawimawh nachang an hre tawk lo a nih pawhin, tunlai ṭhalaite chuan kum tam tak an la hman ṭangkai tur ramngaw humhalh beihpui thlaknaah hian thlirtu mai ni loin, a taka thawktu i ni ang u," a ti.

E&F Minister chuan, tuihna tlem chhan te, khawlum zual zel chhan te, sik leh sa mumal loh chhante chu ramngaw chereu nen a inzawm tlat tih sawiin, "Hrehawmna tam tak hi kan insiam chawp a ni a, a siamṭhat hna pawh kan kutah a awm. Ramngaw humhalhah harhna Mizoramin a mamawh a ni," a ti.

Lalrinmawia Ralte hian PUC Botany department-in pár chhuah lo ramhmul chi hrang hrang an college campus chhung ngawa an hmuh chung­chang zirchianna lehkhabu an buatsaih a tlangzarh a ni.

World Forestry Day puala intihsiakna hrang hrang result puan a ni a, a ti ṭha zualte hnenah lawmman pek vek a ni. Thlalak huangah SLR category-ah Vanlalbiaksanga Sailo, Upper Kanan pakhatna a ni a, Aim & Shoot category-ah Zakhuma, West Phaileng leh mobile phone camera thlalakah K Lalduhawmi, Armed Veng South pakhatna an ni.

Article inziahsiakah Lal­hmangaihzela, Pehlawn pakhatna a a ni a; slogan inphuahsiakah B Lalthlengliana, Saron Veng pakhatna a ni. Short film siamah Mission Vengthlang branch KṬP chan 'Tukloh ram' tih pakhatna a ni bawk.