PWD Act hnuaiah Mizoram sorkarin Sorkar hnaah rualbanlo 45 thun tawh

Mizoram sorkar chuan The Persons with Disabilities (Equal Opportunities, Protection of Rights & Full Participation) Act 1995 (PWD Act) hnuaiah sorkar hnaah rualbanlo mi 45 a thun tawh. Hetih lai hian, sorkar hnaa rualbanlote tana post awm zat chu 873 a ni.

March 11, 2015-a PWD Act bawh­­zuitu, State Level Coor­di­nation Com­mittee member-te an chairman, Social Welfare minister PC Lalthanliana hoa ṭhutkhawmnaah rualbanlote hamṭhatna tur leh PWD Act, 1995-in a phutte tih­hlawhtlin dan tur an ngaihtuah.

Meeting-a an tarlan danin, Mi­zo­ram sorkara department hrang hrangah rualbanlote tana post awm zat chu 873 a ni a, chung zinga 45 chu hnawhkhah tawh a ni. Post awm zat aṭanga rualbanlo sorkar hna pek tawh zat hi 5.15% a ni.

PWD Act ang chuan, sorkar hna Group A, B, C leh D-ah hna awm zinga 3% chu rualbanlote tana hauh a ni a, hei hi Central sorkar leh state sorkar tinte chu zawm vek tura tih an ni.

Mizoram sorkarin rualbanlote sorkar hna a pek tawh zat chu - Group A-ah panga, Group B-ah pariat, Group C-ah 15 leh Group D-ah 17 an ni. Hetih lai hian, rualbanlote tana department hrang hranga post awm zat chu Group A-ah 140, Group B-ah 191, Group C-ah 420 leh Group D-ah 122 a ni.