Group YMA-in kawngpui an siam

Tuivai group YMA-te chu March 20, 2015 khan group conference thurel angin Suangpuilawn leh Zawngin inkar kawngpui siamṭhain an hnatlang a, YMA member mi 400 vel an thawk chhuak a, Zawngin khawtlangin hnatlangte tan zanriah an buatsaihsak.

Suangpuilawn-Zawng­in kawng hi Tui­vai group YMA chhunga khaw pali - North Khaw­lêk, Vanbawng, Làmherh leh Suang­puilawn ten Phullen BDO an dàwrna kawngpui ber a ni a; a chhiat lutuk avangin YMA-in hnatlangin an thawm ṭha ta a ni. Tuivai group YMA hruaitute chuan, "Kan hnatlang hi sorkar tihmualpho tumna a ni lo a, chutih rualin kan hmalakna hi sorkarin min chhunzawmsak ngei se kan duh hle," an ti.

Tuivai group YMA hruaitute chu hnatlang zawhah an ṭhukhawm nghal a; Tuivai group huam chhungah Mizoram pawn aṭanga pém lutte chu an pèmsan khua aṭangin pem lehkha nei ngei turin an phût a, "Pém lehkha nei lote chu khaw chhungah dawn loh ni rawh se," an ti.