Muallianpuia pitar thattu a inpuang

March 16, 2015 zinga a khuma thia hmuh, Ngunhnemi (87) m/o Laltlanmawia, Muallianpui thattu, Lalrindika (29) s/o Machhingi, Muallianpui chu Inrinni khan police hmaah a inpuang a, Lunglei District Jail-ah dah nghal a ni.

Thu dawn danin, Ngunhnemi chu lungphu châwla thia ngaih a nih avangin March 16-ah vek vui a ni a; mahse a hnuah Rs. 20,000 chuang a bo tih an hriat chhuah avangin March 19, 2014-ah South Vanlalphai Police Station-ah FIR an thehlut a ni. Police-te chuan March 20-ah thu zawhfiah atan Lalrindika an man a, Lalrindika chu March 21-ah a inpuang zui a ni.

Lalrindika inpuan hnuah Mual­lianpuia ṭhalai 150 vel chuan Inrinni zan khan Lalrindika an kawlna Hnahthial Police Station an pan a, Lalrindika chu jail-ah an dah tawh avangin nimin zing khan Muallianpuiah an let leh a ni.

Muallianpui YMA president sawi danin, Lalrindika hian kum 2007 khan Lungtian khaw rama luia an kalnaah a lui kalpui mi pa­khat a that tawh bawk a ni. Mual­lianpui khawtlang hruaitute chuan, Lal­rindika chu a na thei ang bera hrem an phût thu leh, jail aṭanga a chhuak leh a nih pawhin an khuaa a awm an remtih tawh loh thu an sawi.