Covid-19 vei negative tawh chauh Chhuahtir turin thutlukna siam a ni

Health & Family Welfare minister Dr R Lalthangliana hoin nimin khan Secretariat conference hall-ah Covid-19 chungchanga inràwnkhawmna neih a ni a, Covid-19 vei enkawlte chu an vei tawh lo tih finfiah (negative) a nih hma chuan chhuahtir loh an rél.

Dr R Lalthangliana chuan, Ministry of Health & Family Welfare chhût danin, kumin December-ah chuan Mizoramah Covid-19 vei mi 5,000 an tling tura ngaih a ni tih sawiin, "Hetiang kan nih avang hian Contingency Plan siamin kan inruahman lâwk tawh a, kan Chief Minister pawhin kan ruahmannate min pawmsak tawh. CCC indaih lohna phuhru turin theihtawpa hmalak a ni a, YMA leh kohhrante ṭanpuina kan la mamawh dawn chauh a ni," a ti.

Meeting-a an rêl dan chuan, Covid-19 veite an swab sample endik nawnnaah an negative hma chuan enkawlna hmun, CCC/DCHC/DCHC aṭanga chhuahtir loh tur a ni. Mizoramah hripui vei an pung zel a, CCC/DCHC/DCHC-ah indah sên loh hun a thleng a nih chuan, mipui mar dek chung leh mipui ngaihdan ngaichâng chungin thutlukna siam ni se, tiin an rél.

CCC atana hman tur 4 hmuh thar a nih thu tarlan a ni a, chungte chu - JNV School, Thingsulthliah (khum 318 awm theihna), Montford School, Melriat (khum 86 awm theihna), Gilead Special School, Bawngkawn, Aizawl (khum 53 awm theihna), SIRD Hostel, Thingsulthliah (khum 25 awm theihna) te an ni.

Veng leh khaw ṭhenkhatah CCC awm an remtih loh avanga harsatna awm ṭhin pawh sawichhuah niin, heng CCC te hi pawn lam mi tan a hlauhawm loh thu inhrilhfiah chian a ṭul tih a ni.

Ṭhutkhawmah Covid-19 Medical Operational Team chairman Dr ZR Thiamsanga, MLA, chief secretary Lalnunmawia Chuau­ngo, Health secretary H Lalengmawia, Home secretary Lalbiaksangi, IGP (Law & Order) LH Shanliana, Central YMA, Mizoram Kohhran Hruaitu Committee, Indian Medical Association leh Mizoram Government Doctors' Association aiawhte an tel a ni.