Covid-19: Mizoram dinhmun Hripui kai tawh zat - mi 1,093

Aizawl district-a awm mi pakuate chu mipa puitling vek, civil mi pariat leh Assam Rifles mi pakhat an ni a; an zinga pariat chu state páwn aṭanga rawn lut an ni. Pakhat chu Zemabawk pa kum 54 mi a ni a, Mizoram chhunga mi dang aṭanga kái chhâwng niin, a kàina tur âwm hriat a ni lo.

Lunglei district-a mi pakhat chu BSF sipai a ni a, Siaha district-a mite chu mipa vek niin, naupang kum 4 mi a tel a; Mamit district-a mite chu mipa pahnih leh hmeichhia pakhat, kum 20-34 inkar an ni. District pathuma mite hi state páwn aṭanga rawn lut, quarantine facility-a awm lai vek an ni a; symptom an nei lo hlawm.

September 5, Inrinni khan Covid-19 vei mi 31 hmuh chhuah leh a ni a, symptom lang lo vek an ni. An zinga mi 26 chu ZMC laboratory-a hmuh chhuah niin, Aizawl district-a mi 25 leh Lawngtlai district-a mi pakhat (mipa kum 25) an ni a, mi panga chu RAT hmanga Vairengte checkgate-a hmuh niin, hnam dang driver/handyman an ni. Hetih lai hian, September 5-ah hian zing dar 5 leh tlai dar 5 inkarah Vairengte-ah hripui vei hmuh chhuah paruk a awm niin Kolasib district administration lam chuan an tarlang thung.

ZMC-a hmuh chhuah mi 25 zinga 19 chu state pawn aṭanga rawn lutte an nih laiin, mi paruk chu Mizoram chhunga kái chháwng (positive contact) an ni. State pawn aṭanga rawn lut mi 19-te chu khung hran lai vek an ni a, naupang kum 6 mi pakhat telin, a bak zawng kum 27-70 inkar, mipa vek an ni. Mi 19 zinga 15 chu Thingsulthliaha Pioneer camp-a awm an ni bawk.

Mizoram chhunga kái mi paruk zinga pathum chu medical staff, kum 26-51 inkar, mipa pakhat leh hmeichhia pahnih an ni a; pakhat chu Chanmari West Local Task Force member kum 24 mi niin, a kai ṭanna rin an nei lo. Positive contact dang pahnih chu company-a thawk mipa kum 46 mi ve ve, Thingsulthliaha awm an ni.

Inrinni khan SRH-ZMC aṭangin mi 12, Covid Care Cenrte (CCC) Berawtlang aṭangin pathum, Zokhawsang CCC aṭangin pariat, Tribal Art Centre CCC aṭangin pali, Lunglei Pukpui CCC aṭangin pakhat, Lawngtlai CCC aṭangin pali, Serchhip CCC (Nursing School) aṭangin pahnih leh, Serchhip Dedicated Covid Health Centre (DCHC) aṭangin mi pakhat an chhuak.Nimin khan State Referral Hospital aṭangin mipa 10 leh hmeichhia pathum, an vaiin mi 13 an chhuak a, civil mi 12 leh sipai pakhat an ni a; CCC, ITI, Aizawl aṭangin civil mi paruk, mipa pahnih leh hmeichhia pali chhuahtir an ni bawk.