Lengpui Airport-a Mizoram sorkar sum hmuh leh hman a inthlau
Kum (financial year) 4 kal ta chhung khan Lengpui Airport-a sorkarin thla tina sum a sên zat chawhrual belhkhawm chu nuai 1,073.03 a ni a, thla tina sum hmuh chhuah zat chawhrual belhkhawm chu nuai 156.25 a ni thung a; sum sên zat hi nuai 916.78 (85% vel)-in a tam zawk.
August 20-21, 2024 chhunga Legislative Assembly session-a MNF member Ramthanmawia zawhna GAD changtu chief minister Lalduhoma'n August 21-a ziaka a chhan danin, Lengpui Airport enkawlna atana sorkarin thla tina sum a sên zat chawhrual chu kum 2020-21 chhungin nuai 359.43, kum 2021-22 ah nuai 305.37, kum 2022-23 ah nuai 291.19 leh kum 2023-24 chhungin nuai 117.04 a ni a; belhkhawmin nuai 1,073.03 a ni.
Kum khat chhunga thla tina sum sên zat chawlhrual hi thla 12 anga chhût chuan, kum 2020-21 chhungin cheng nuai 4,313.16 (359.43 X 12) sên a ni tihna a ni a; kum 2021-22 ah nuai 3,664.44 (305.37 X 12), kum 2022-23 ah nuai 3,494.28 (291.19 X 12) leh kum 2023-24 chhungin nuai 1,404.48 (117.04 X 12) sên a ni tihna a ni bawk. Belhkhawmin nuai 12,876.36 a tling.
Lengpui Airport aṭanga Mizoram sorkarin thla tina sum a hmuh zat chawhrual chu kum 2020-21 chhungin Rs 73,000, kum 2021-22 ah nuai 27.28, kum 2022-23 ah nuai 43.66 leh kum 2023-24 chhungin nuai 84.58 a ni a; belhkhawmin nuai 1,073.03 a ni.
Kum khat chhunga thla tina sum hmuh zat chawlhrual chu thla 12 anga chhût chuan, kum 2020-21 chhungin cheng nuai 8.76 (0.73 X 12) hmuh a ni tihna a ni a; kum 2021-22 ah nuai 327.36 (27.28 X 12), kum 2022-23 ah nuai 523.92 (43.66 X 12) leh kum 2023-24 chhungin nuai 1,014.96 (84.58 X 12) hmuh a ni tihna a ni bawk. Belhkhawmin nuai 1,875 a ni.
Chief Minister chuan MNF member H Lalzirliana zawhna a chhannaah, kumin 2024 January-July thla chhungin Lengpui Airport aṭangin Rs 4,38,98,500 hmuh a nih thu a tarlang bawk a; chawlhrualin thla tin cheng nuai 62.71 la lut ang a ni.