Sorkar hnathawkte dinhmun thlir lettu committee din dawn

Mizoram sorkar chuan sorkar hnathawkte thawk zui zel tlak an nih leh nih loh thlir let ṭhintu tur committee a din dawn.

DPAR Minister-in August 31, Inrinnia thuthar thehdarhtute a kawm­naa ṭawiawmtu DPAR secretary K Lalthawm­mawia chuan, Mizoram sorkarin sorkar hnathawk, an pension hun hma pawha pension-tir (pre mature retirement) theihna Periodical Review of Government Employees a hman ve tawh dawn thu a sawi a, "Hemi atan hian department chuan August 21, 2024 khan office memo­randum a tichhuak tawh," a ti.

K Lalthawmmawia chuan, Periodical Review of Government Employees chu dan awm sa a nih thu sawiin, "Central-ah phei chuan kum khatah vawi lite sorkar hnathawk dinhmun thlir lêt a ni ṭhin. Mizoramah hian kan la hmang ve ngai lo a, hman ve tawh turin sorkarin huaisen takin thutlukna a siam a ni," a ti a, a ṭangkai viau tur thu a sawi.

DPAR Secretary sawi danin, Periodical Review of Government Employees hnuaiah hian department tinah review committee din a ni ang a, committee chuan sorkar hnathawkte dinhmun a mal malin an thlir let ṭhin ang. Committee-in sorkar hna thawk zui zel tlak loa a ngaihte chu pre mature retirement-in chawlhtir theih a ni dawn.

Hei hi inhremna a ni lo a, mipui tana ṭha zawk tur a nih avanga sorkar hna­thawkte an pension hun hmaa chawlh­tir theihna a nih thu a sawi bawk.