Delhi-ah sports minister pahnih inkâwm

Sports & Youth Services minister Lalnghinglova Hmar chuan August 31, Inrinni tlai khan sorkar laipuia Youth Affairs and Sports minister Dr Mansukh Mandaviya chu New Delhi-a a chenna inah a kâwm a; Mizo ṭhalaite’n infiamnaah theihna sang tak an neih thu a hrilh.

Lalnghinglova Hmar chuan, Mizoram chu state lian lo leh mihring tlemna ni mah se, India ram chhung leh ram pawn thlenga hriat hlawh Mizo infiammi eng emaw zat an awm thu a sawi a, "Mizo ṭhalaite’n infiamnaah theihna sang tak an nei a, sorkar laipui hnuaia infiamna tihhmasawnna tur scheme hrang hrangah Mizoram telh ni se kan duh," a ti.

India-in kum 2036-a Olympic Games thlen a tumnaah Mizoramin tel ve ngei a tum thu sawiin Lalnghinglova chuan, June 13-14, 2024 chhunga Mizoram Sports Conclave buatsaih khaikhawmna lehkhabu chu Union Sports Minister hnenah a pe a; infiamna chi hrang hranga theihna nei ṭhate hai chhuah nana Mizoram khaw tin hrût chhuaka sport coaching kalpui tum dan a hrilhfiah.

Union Sports Minister chuan, Mizoram leh India rama infiamna hmasawn nan theihtawp chhuah a tum thu a sawi a; Vision 2036 Olympics nei chunga Mizoram sorkar hmalak tawh dan leh hmathlirte chu lawmawm a tih thu sawiin, Mizoram Sports Minister chu a theih anga puih a tum thu a hrilh.

Sports minister pahnih hian Union Sports Ministry hnuaia scheme hrang hrang, a bikin Khelo India hnuaia Mizoram tana hmalak dan tur leh sorkar laipui scheme dangte hmanga Mizorama infiamna tihhmasawn theih dan turte an sawi dun a ni.

Mizoram ngeia infiamna hmasawnna chungchang sawi dun tura minister Lalnghinglova'n a sâwm chungchangah Dr mansukh Mandabiya chuan hun remchang hmasaah Mizoram tlawh a tum thu a sawi.