Mizoram lottery kalpui dan an khing; Hlâwk zawka kalpui theih a ni ṭêp tawh

Mizoram sorkarin lottery a kalpui dan chu Gauhati High Court, Aizawl Bench-ah khin a ni. Hetih lai hian, hlâwk zawkin lottery kalpui theih a ni ṭêp tawh.

Mizoram sorkarin lottery a kalpui danah hnam dangte'n GHC, Aizawl Bench-ah hian public interest litigation (PIL) an thehlut. Mizoram sorkar chuan an paper lottery atana an distributor pakhat chu paper lottery-te online mode (website, mobile application, etc)-a zawrh a phalsak thu tarlangin, Lotteries (Regulation) Act, 1998 and the Lotteries (Regulation) Rules, 2010 kalh a nih thu an thlen a ni.

Mizoram sorkar thil tih dan chuan Ministry of Home Affairs (MHA)-in January 22, 2019-a circular a chhuah a kalh niin High Court-ah thlen a ni. An tarlan danin, MHA-in notification July 18, 2018-a a chhuah ang chuan online paper lottery kalpui tur chuan Mizoram sorkarin Sensitization Testing and Quality Certification (STQC) a neih a ngai a, nei si loin a kalpui a ni.

Mizoram sorkarin lottery a kalpui dan chungchanga PIL lut hi Gauhati High Court chuan ṭum khat a ngaihtuah tawh a, September 9, 2024-ah a ngaihtuah leh ang.

Vanglaini zawhna chhangin Mizoram Institutional Finance and State Lottery (IFSL) hotute chuan, distributor-te chu an iner ve ṭhin avangin court-ah an inkhing fo tih an sawi a, "Tun ṭum pawh hi distributor-te inerna lam kaihhnawih a nih hmel," an ti.

MIFSL hotute chuan, STQC an neih kim thawkhat tawh thu sawiin, "Kan neih kim hun chuan online lottery kan kalpui thei dawn a, distributor dang pathum kan neih belh theih kan beisei," a ti a; STQC a fel hunah tuna Mizoram sorkarin lottery aṭanga sum a hmuh chu a lêta a pun theih beisei a nih thu an sawi.

MIFSL hotute sawi danin, lottery distributor-te chu kum 5 atan zel inremna ziahpui an ni a, distributor pahnih an awm mek. Distributor pakhat nena agreement chu tun hnaiah a tawp a, inremna ziahpui leh tum a ni. Kumin sorkar kumah hian lottery aṭang hian cheng vbc. 20 vel hmuh theih beisei a ni.

Tuna Mizoramin distributor a neihte chu paper lottery atan vek a ni a, STQC a fel hunah chuan online lottery atan distributor dang pathum neih theih beisei a ni. Chumi hunah chuan sorkarin kum khatah cheng vbc. 40 vel a lak luh theih ngei beisei a ni.