Mizoram kawng siam chungchangah Central YMA-in PWD puih an inhuam

Central YMA hruaitute leh PWD hotute chu August 30, 2024 tlai khan PWD engineer-in-chief pisa conference hall-ah an inkâwm. CYMA hruaitute chuan, Mizorama kawng siamtute'n chak zawka hna an thawh theih nan PWD-in puih an ngaihnaah puih an inhuam thu an sawi.

Inkawmhona hi PWD engineer-in-chief Lalrinkima Hnamte-in a kaihruai a; PWD aṭangin hotu liante an tel a, CYMA aṭangin president Lalhmachhuana leh office bearer dangte an tel.

Mizorama inkalpawhna kawng dinhmun leh CYMA leh PWD-in thawhhona thuthlung an ziah tawh chungchangte sawiho a ni a; CYMA hruaitute chuan, kawng siam hna thawk mektute zinga hna thawk chak lote'n chak zawka hna an thawh theih nan PWD-in puih an mamawh chuan puih an inhuam thu PWD hotute an hrilh.

Aizawl khawpui chhung kawngpui chhe lutuk chungchang te, Mizoram hmun hrang hranga PWD enkawl kawngpui siam mek zingah Champhai-Zokhawthar inkar kawng siam mek te, Mamit-Bairabi inkar leh Saikhawthlir-Zamuang inkar kawng siam mek chungchang te, kum 2025-a YMA Inkhawmpui Lian thlenna tur Sakawrdai panna kawng siamṭhat chungchang leh Mizoram hmun hrang hranga PMGSY kawng laih mek chungchangte sawiho a ni bawk.

PWD hotute chuan, Aizawl khawpui chhung kawng chhia leh khuar nasa lutuk chu ruahtui a tlak reng avangin thawm ṭhat mai theih a nih loh thu sawiin, khaw a ṭhat veleh thawm ṭha tura an inpeih sa thu an sawi.

CYMA leh PWD hian June 2018 aṭang khan kawngpui ṭha neih theihna turin thawhhona thuthlung an ziak a, tuna MoU an neih mek chu July 2025-a tàwp tur a ni.