Teachers Day-ah badge dum bel tum

Federation of Mizoram Samagra Shiksha Employees (FEMSE) chuan, hlawh an lak loh chuan an member-te'n September 5, 2024-a Teachers Day lawmnaah badge dum an bel dawn thu an puang.

FEMSE chuan an member-te tana hriat tur tichhuakin, Samagra hnuaia thawkte'n thla thum hlawh an la tawh lo tih an tarlang a, "A chhan hrang hrang zingah central sorkar aṭanga sum lo thleng, hun rei tak state sorkar treasury lamin a hrên khawtlai/release har vang a ni," an ti.

FEMSE Council chuan, an dinhmun ngun taka an ngaihtuah hnuah kumina Teachers Day chu badge dum bel chunga hman an rel tih tarlangin, "Samagra hnuaia thawk zawng zawngte lungrual taka FEMSE Council rorel hi zâwm turin kan inngen," an ti a; an dinhmun hriatsak a, a rang thei anga hma laksak turin sorkara thuneitute an ngen.

FEMSE hnuaia pawl hrang hrang member te, sub headquarters hruaitute zawng zawng chu an huam chhunga member-te ngaihven a, FEMSE Council rorel tihlawhtling ngei tura theihtawp chhuah tura tih an ni.

Teachers Day-ah badge dum bel an tum thu hi FEMSE chuan August 29, 2024 khan ziakin Education Minister an hrilh a; dinhmun khirh takah an awm thu tarlangin, "Hun rei tak hlawh la loa kan awm chhan hi Mizoram treasury-in Samagra sum nuai 773.10 (March 2024 tawpa central aṭanga sanction tawh) rei tak a hren khawtlai vang a ni. A huna sum release loh avangin central aṭanga sum lo kal leh tur nasa taka tihkhawtlai mek niin, tun hi kan lo thleng ta a ni," an ti.