Wholesale market sakna tur enfiah

Enviroment, Forest & Climate Change (EFCC) minister Lalthansanga leh Agriculture minister PC Vanlalruata chuan August 31, Inrinni khan Sihphir Venghlun, Phunchawng, Falkawn leh Melthumah te Agriculture Produce Wholesale Market sakna tur hmun an enfiah.

Lalthansanga chuan, kut hnathawka eizawng tam tak an awm tih sawiin, "Thlai thar hralh chungchangah harsatna an tâwk nasa hle ṭhin. Kan thlai tharte hralhna tur wholesale market kan neih chuan a hralhna kawngah hmasawnna a awm phah ngei ka beisei," a ti.

PC Vanlalruata chuan, wholesale market hman ṭangkai dan turte sawiin, "Thlai thar vawn ṭhatna tur cold storage leh kut hnathawktute hah chawlhna rest room bakah, market building chhungah ATM booth-te dah tum a ni," a ti a; kut hnathawktute tan malsawmna thar a thlen ngei an beisei thu a sawi.

Agriculture Produce Wholesale Market hi RKVY scheme aṭanga sak tum a ni a, Mizorama thlai tharte zawrhna atan Aizawl kawtchhuah hmun paliah sak tum a ni. Aizawl hmar lam leh chhim lam kawtchhuahahte hmalak hmasak a ni ang.