KHAWTHLIR

Ramthar Ni

Mizoram Presbyterian Kohhran chuan August 31, Inrinni khan Ramthar Ni an hmang a, thupui chu 'Chung lam aṭanga chhuakin min rawn tlawh' tih a ni. August 31 hi Mizorama Presbyterian Kohhran dintu Rev. David Evan Jones (Zosaphluia)-a'n kum 1897-a Mizoram a rawn thlen ní a ni a, kum 1973 aṭangin Ramthar Ni atan an hmang a ni.

END leh CYMA

Excise and Narcotics Department (END) commissionerate-a thawkte leh Central YMA Kumpuan Committee member-te chu August 31, Inrinni khan END conference hall-ah an inkâwm. Inkawmhona hi CYMA Committee member Vanlalruata'n a kaihruai a; India ramin dan (criminal law) thar a hman tak - BNSS, BSA leh BNS zirho nghal a ni.

Chawimawina hlan

Minister of state B Lalchhanzova chuan August 30, 2024 khan a bial chhunga Saron Veng Branch MZP buatsaih pawl 10 chin chung lam zirlai pass tharte chawimawina hun a hmanpui. Minister hian Saron Venga zirlai hlawtling thar 85 hnenah lawmpuina a hlan a; zirlaite chu an hlim ni leh lungngaih niah te, thil hrang hrang an hmachhawn níah nun kaihruaitu atan mi hmingṭha leh entawn tlakte entawn bik nei turin a chah.

Tuia tla hlum hmu

August 30, 2024-a Hnahchanglui Zawngek lía tla hlum C Lalruatdika (22) s/o C Lalengmawia, South Vanlaiphai chu August 31, Inrinni chawhma dar 10:30 vel khan a tlakna lí-ah hmuh a ni. C Lalruatdika hi a ṭhianpa C Roluahpuia nen Hnahchangluiah nghakuai chiaha kal an ni.

Solar light sem

AMC executive corporator B Lalawmpuii chuan a bial, Ward-IX huam chhunga zirlai harsa zawkte tan solar lighting system 170 a sem. B Lalawmpuii hian August 31, Inrinni khan Saron Veng Local Council House-ah solar lighting system-te chu an ward huam chhunga local council-te hnenah a hlan a, LC-te'n zirlai harsate hnenah an sem ve leh ang.

In chim

Nimin chawhnu dar 2 vel khan Vaivakawn Zohnuaia Sangthanmawia te in, RCC building a chim. In hi a him loh avangin hun eng emaw chen luah a ni tawh lo a, Aizawl District Disaster Management Authority (DDMA) chairman Lalhriatpuia, Aizawl DC pawhin August 29, 2024 khan a rang thei ang bera ṭhiahna tur thupek a tichhuak a ni.