Dan angin kum tin power tariff ennawn a ngai Power hman man ennawn dawn

Power & Electricity department changtu chief minister Lal Thanhawla chuan, Joint Electricity Regulatory Commission (JERC) for Manipur and Mizoram (Multi Year Tariff) Regulations 2014-in a phût angin, kawlphetha hman man chu kum tin ennawna siam tur a nih thu House a hrilh.

MNF member Dr K Beichhua zawhna chhangin CM Lal Than­hawla chuan, JERC danin kum tin kawlphetha hman man ennawn tur a nih angin, P&E department-in kawlphetha hman man tihsanna tur rawtna chu JERC-ah a thlen thu a sawi.
Lal Thanhawla chuan zawhna chhangin, kum 2014-15 atana P&E department-in power tariff ruahmanna thar JERC-a a thlen mek chu tuna hman lai aiin 2%-in a sang dawn niin a sawi a, "Hei hi JERC-in dik leh âwm tâwka ngaiin a fixed ta a ni," a ti.
Chief Minister sawi danin, P&E department-in kawlphetha hman man tihsan dan tur rawtna JERC-a a thlen ang chuan, power unit 50 hman man Rs. 130 ni mek chu Rs. 135-ah tihsan a ni a, a sanna rate chu 3.8% a ni. Power unit 100-ah Rs. 280 ni mek chu Rs. 285 a ni dawn a; unit 200-a Rs. 660 ni mek chu Rs. 675 (2.27%)-ah a pung a; unit 300-a Rs. 1,110 ni mek chu Rs. 1,135 (2.25%)-ah a pung dawn a ni.
Lal Thanhawla chuan, P&E department-in kum khat chhunga kawlphetha leina, semna leh thil danga sum a mamawh zat chu cheng vbc. 199.47 a nih thu a sawi a, chutih laiin, tariff thar hman a nih hunah electric bill aṭangin kum khatah cheng vbc. 152.92 hmuh beisei a nih thu a sawi.
Zawh belhna chhangin CM Lal Thanhawla chuan, kawlphetha megawatt 460 pe chhuak thei tur Kolodyne HEP siam tum chu DPR ennawn a ngaih vang te, clearance lak tur neuh neuh a la awm vang te, kuttling loa sum lak tumte avangin harsatna an la neih thu a sawi bawk.