MJA Rising Day vawi 43-na lawm

Mizoram Journalist Association (MJA) din cham­pha vawi 43-na chu nimin khan Aizawl Press Club-ah lawm a ni a, MJA member ṭhahnem tak an tel.

MJA Rising Day lawm­na hi MJA vice pre­sident Zonunsanga Khiangte-in a kaihruai a; MJA president Vanlalrema Vantawl chuan eizawnna ngaih pawimawh a ṭul thu sawiin, "Media-te'n kan tih tur chu midangte thuthar hriattir a ni a, chumi tihlawhtling tur chuan theihtawp kan chhuah tur a ni. Hamṭhatna kan um luatah kan innghahna kan kalsan mai ang tih a hlauhawm,” a ti.

Fuihna thu sawitu, MJA president hlui K Sap­danga chuan, jour­nalist-te chu ram leh hnam, khawtlang leh sorkar pawhin rintlaka a ngaihte an ni tih sawiin, "Mite rin ngam turin hna i thawk ang u. Rinawm tak leh ṭha taka hna kan thawh hian kan zahawm a ni," a ti a; MJA member-te impumkhat taka ram leh hnam tana thawk zel turin a fuih.

Inkhawmah hian MJA secretary Lalhma­chhuana'n MJA hmalakna hrang hrangte a tarlang a, member-te'n an ngaih pawimawh hrang hrangte an sawi bawk.

MJA Rising Day hi Lawngtlai District MJA pawhin Lawngtlai Press Club-ah an lawm a, Lawngtlai DC J Hming­thanmawia'n a hmanpui. Lawngtlai DC chuan, chanchinbumite chu sorkar leh mipui inkara palai hna thkawtu pawi­mawh tak an ni tih hre nawn fo turin a chah.

Lawngtlai District MJA hian MJA din cham­pha pualin Lawngtlai District Hospital, Lairam Christian Medical Centre leh Christian Hospital-ah poor fund atan Rs. 2,000 ṭheuh an pe.

MJA hi March 23, 1972-ah din a ni a, pre­sident hmasa ber chu tuna chief minister, Lal Thanhawla hi a ni.