Dâwt hmanga Deputy CM beiah MNF-in MPCC leh ZPM an puh

MNF party chuan September 5, 2020 khan thuchhuah siamin, MPCC Media leh ZPM Publicity department-te'n deputy chief minister Tawnluia chu thu­chhuah siamah dâwtin an puh niin an tarlang.

MNF tarlan danin, MPCC Media chuan an thuchhuahah, Tawnluia chu Khawzawl, Tualte leh Riangtlei khuaahte Congress leh ZPM VC member-te MNF party hruaitute thlêmtirah an puh a, 'Riangtlei khuaah phei chuan ZPM ticket-a thlan tlin chu vau betin, sorkarna an siam phah hial tawh' tiin an tarlang. MPCC thuchhuah hi dâwt hmanga inpuhna tenawm tak a nih avang­in an ngai thu tak hle tih an sawi.

MNF Tuichang South Block chuan thuchhuah siamin, 'Hetianga Dy. Chief Minis­ter beihna an chhuah fo hi ná kan ti tak zet. Bialtu MLA (Dy.CM)-in a bial chhung a rawn fan theih loh lai denchhena amah beihna an chhuah mai hi tun chinah chuan thleng nawn tawh lo se kan ti,' an ti. 

ZPM Riangtlei Unit pawhin thuchhuah siamin, khawtlang ṭhatna tura thawhhona ṭha an neih theih nan ZPM leh MNF-te'n Joint Committee neia an thutlukna a nih thu an tarlang a, "Hetiang hmanraw tenawm tak Congress party-te'n an hmang ta mai hi ṭha lo kan ti," ti, tiin, dâwt hmanga inbeihna awm tawh lo se an duh thu an tarlang.

MNF party chuan, dâwt hmanga Dy. CM puhna reng reng vawrh darh lo turin MPCC leh ZPM chu an chah a, "Rei lo têa dâwt tih lang leh mai tur hmanga inbeihna hi an tan a tlo lo tih thurâwn kan pe nghal duh a ni," an ti.