Congress ṭhalaiin GAWSS an tlawh

Mizoram Pradesh Youth Congress Committee (MPYCC) chuan, nimin khan an president Vanlalawmpuii Chawngthu, MLA hoin Greater Aizawl Water Supply Scheme (GAWSS) Phase-II an tlawh a, hnathawh dan an enfiah.

Vanlalawmpuii Chawngthu chuan PHED hotute hnathawh dan chu lawmawm a tih thu sawiin, "Rim leh ṭhahnemngai taka tui pump hna an thawh mai bakah Tlawng lui tui humhalh hna an thawk tel hi an fakawm hle," a ti a, ram leh lui humhalh chungchanga PHED hmalakna
ṭha taka thlawp tlattu Maubawk leh Ailawng VC leh YMA hnenah lawm thu a sawi.

MPYCC-te lo dawngsawngtu PHE hotute chuan tun hma kum hnih hma lama tui an pump aiin tuna an pump zat 30% a lo pun tak chhan chu tui pump nana power an mamawh zat hnianghnar zawka an hmuh tak vang a nih thu sawiin, "Kan inbeisei anga hma kan sawn zel chuan heng Aizawl khaw chhehvel pawh hian hnianghnar zawka tui pek thuai kan tum," a ti.

MPYCC tarlan danin, Aizawl khawpui chawmtu Tlawng lui tui pump zat chu kum 2014 aiin kum 2016-ah 30% in a pung a, hei hi tun hma aiin P&E department-in PHE hnenah Dihmunzawl-a tui pump nana electric power hnianghnar zawka a pek tak vang a ni.

Tun dinhmunah hian Aizawl khawpui chhungah tui connection nei mi 50,000 an tling ṭep tawh a, heng tui connection neite chawmtu tur hian nitinin Greater Aizawl Water Supply Scheme Phase I & II aṭangin tui litre nuai 220 vel chu Tuikhuahtlang-ah pump chhoh
ṭhin a ni. Chu chu rualkhai taka sem a nih chuan ni khata Aizawl khawpui chhung tui mamawh a phuhruk pha nia hriat a ni.

Tunah hian fur lai bikin gravity hmangin Lungleng kai chhakah tui khuapin Dihmunzawlah lak thlak a ni a, hei vang hian man to taka electric hmanga tui pump chu a chhawk hle.

Nikum July-October fur chhung gravity hmanga tui lak a nih chuan cheng nuai 66 chuang sorkar-in electric current man tur a hlep theih phah a, kumin May leh June chhungin cheng nuai 25 a hlep tawh.