Medical Officer thar 27-te tan training

Mizoram sorkar hnuaia medical officer atana lak thar doctor 27-te tan nimin khan Aizawl Civil Hospital conference hall-ah foundation course training neih ṭan a ni.

Training hawnna hi Health Services director Dr Rohmingthanga Ralte-in a kaihruai a; fuihna thu sawitu, Health principal director Dr K Ropari chuan, MO tharte chu an hnaah ṭhahnemngai taka thawk tur te, mahni awmna bial chhung fan kawngah thâ thlah lo tur te, damlo leh mipuite tana rin ngama awm turte leh, an nungchang uluk turtein a chah.

Medical officer-te training hi March 25, 2015 thleng neih a ni dawn a, mithiam hrang hrangin an zirtir ang.