Fisheries hnathawkte'n khawmpui an hmang

Mizoram Fisheries Technical Service Association (MFTSA) chuan, nimin khan Fisheries Directorate conference hall-ah general conference an hmang a, Fisheries minister Dr. BD Chakma-in a hmanpui.

Dr. BD Chakma chuan hlawhtling turin inlungrualna, taimakna leh thawhhona ṭha a pawimawh tih sawiin, "Famkim tumah kan awm lo a, Mizoram tana department hmalakna a hlawhtlin theihna atan thawktu a te ber aṭanga a lian ber thlengin an pawimawh. Department lamin tihdik loh an nei a nih chuan insiamṭhat dan zawn a ngai," a ti a, department-in ram tana thil ṭha a tihte chu langsar se a duh thu a sawi.

Thusawitu dang Fisheries secretary Thlamuana chuan an department-a thawktute chu an hnaah tui tur leh, taima tur te, indaihlohna karah pawh mawhphurhna hlen tum ṭheuh turin a fuih a, "Sangha dil ṭan-puina leh department-in a thlawna a sem chhuah ṭhin thil hrang hrangah a dawngtu tur dik takin an dawng em tih leh, an hmang tangkai em tih an ngaihven tur a ni," a ti.

MFTSA conference hi an president Lalro-chhara'n kaihruaiin, chaw-hnu lamah ro an rel.