Motor number plate siamtu company-in Mipuiah harsatna an thlen - MNF Ṭhalai

MNF ṭhalai chuan thu-chhuah siamin, Mizoram sorkar hnuaia motor plate siamtu Shimnit Utch India Pvt.-in mipuiah harsatna an thlen thu an tarlang.

MNYF tarlan danin, Shimnit Utch India Pvt. hi Mizoram sorkarin kum 15 chhung atan an ruai a, April 2012 aṭangin hna an thawk ṭan. Sorkar nena agreement an sign angin hna an thawk mumal lo a, tunlai hian motor number plate siamna hmanrua (Stock) an neih loh avangin motor register tharten number plate vuah mumal loin hun rei tak an awm phah.

Motor Registration tih rualin number plate (HSRP) man agreement kalhin registration fee an la lawk ṭhin a, registration number DTO in a pek aṭanga ni thum chhunga number plate vuah tura agreement an siam hi an bawhchhia a ni.

MNYF chuan motor number plate a hun taka an siam zawh hman loh avanga, motor-a an bel sak tak loh mipuiin pawisa an pek lawk, an dahṭawl zat chu sing hnih chuan a nih thu sawiin, "Number plate hlut zawng hi cheng vbc. 2.1 a tling a ni. Hei hi sorkar hian a hriatpui em? A hriatpui a nih chuan engvangin nge he company chungah hian action a lak loh?" an ti.

Sminnit Utch Com-pany ten Mizo mipuite min pal zut ngam dan leh agreement anga hna an thawh tawk dan enin, he company leh sorkar inkarah hian man tang ei ve an awm ngei ang tih chu an rin dan a nih thu MNYF chuan an sawi.