Aizawlah thlawhtheihna khalh zirna din tum

India hmarchhak biala National Cadet Corp (NCC) hotute'n nimin khan Assembly session chawlh laiin chief minister Lal Thanhawla chu a recess room-ah an kâwm a, Aizawlah thlawhtheihna khalh zirna din tum a nih thu an hrilh.

NCC hotute chuan Aizawl chu hmar­chhak biala NCC Air Wing hmun­pui ber ni tura ruahman a nih thu an sawi a, "Hmarchhak state dang aṭangin thlawhtheihna khalh zir turte chuan Mizoram an pan a ngai tawh dawn. Hmarchhak pum NCC Air Cadets tan Lengpui Airport leh Tuirial Airfield inkar chu thlawhtheihna khalh zirna turin kan ruahman a ni," an ti.

NCC hotute'n ruahmanna an siam dan chuan, thlawhtheihna khalh zirna atan June, 2016 velah Aizawlah micro­lite aircraft pahnih dah a ni ang a, June, 2017-ah microlite aircraft pahnih dang dah leh a ni ang. Heng bakah hian Aizawla awm sa zen microlite aircraft leh Assam aṭangin pakhat lak luh a ni bawk ang.

NCC tana State Advisory Committee neih ṭul an tih thu NCC hotute'n an sawi chungchangah CM Lal Thanhawla chuan, Advisory Committee-ah hian CM chu chairman niin, member atan School Education leh Sports minister-te ni se tiin rawtna a siam.

NCC hotute hi North East Region (Shillong) additional director general, Satinder Kohli-in a ho a, 20 Mizo NCC com­mander, Col. Youdvir leh wing commander KDV Prasad ten an ṭawiawm a ni.