Kum khata buhfai mamawh quintal 15,86,520

Food, Civil Supplies & Con­sumer Affairs minister John Rotluangliana chuan, kum khat chhunga Mizoram buhfai mamawh zat zawhna chhangin, FCSCA minister chuan, quintal 15,86,520 mamawh a nih thu a sawi a, "Hei hi thla khat chhung mamawh qtl. 1,32,210 anga chhût a ni. Puitling pakhat tan kar khatah kg. 2 anga chhût a ni," a ti.

Nimin khan Assembly session-ah MNF member Lalruatkima chuan, Mizoramin kum khata buhfai a mamawh zat qtl. 15,86,520 a nih thu tarlan a nih laiin, November 14, 2014-a Assembly session-ah Mizoram kum khat buhfai mamawh zat a zawhna chu qtl. 12,98,764.92 tia chhan a nih thu a sawi a; Mizoramin buhfai a mamawh zat chhanna inan loh chhan a zawh chu Supply minister-in chiang takin a chháng lo.

Kum 2013-14 chhunga buh­­­fai lei zat zawhna chu, qtl. 16,36,373.25 lei a nih thuin chhan a ni. Lalruatkima chuan, Mizoramin kum khatah buhfai qtl. 15,86,520 a mamawh anga Supply minister-in a chhan laiin, kum 2013-14 chhungin mamawh aia tam qtl. 16,36,373.25 lei nih chhan a zawt a; John Rotluangliana chuan, "Surplus anga a lan chhan chu inlei lâwkte a ngaih vang a ni a, surplus a awm lo. Kan lo lei khâwl zawk a ni," a ti.

Supply minister-in House a hrilh danin, March 5, 2015 dinhmun angin, Mizoram APL ration card 2,11,784 awmin, chutah chuan hming 12,76,657 a chuang a; BPL ration card 41,900-ah mi 1,99,143 an awm a, AAY ration card 26,100-ah mi 1,15,733 hming a chuang. Ration card zawng zawng zat chu 2,79,784 a ni a, mi 15,91,533 hming a chuang a ni.

Zawhna chhangtu Supply mi­nis­ter chuan, sorkarin January 1, 2015-a buhfai man a tihsan hmain December 2014-ah buhfai man tisang an awm a nih chuan, an chung­ah action lâk a nih tur thu a sawi.

MNF member Lalruatkima chuan nikum December thla khan Supply storekeeper zingah buhfai man thar anga pe chhuak an awm niin a sawi a; chutiang mite chu sorkarin a hriat leh hriat loh leh, an awm chuan hrem tumna a neih leh neih loh a zawt. Hei hi chhangin John Rotluangliana chuan, "Sorkarin kan hre lo a, an awm chuan action kan la ang. Chutiang mi an awm a nih chuan min hrilh se," a ti.