AMC-in Dawrpui-a insak ṭhiahsak dawn

Aizawl Municipal Council (AMC) chuan Samuela, Zion Street, Dawrpui chu March 25, 2015 aṭangin Dawrpuia a insak mek a ṭhiahsak dawn. In ṭhiahsak a nih tur thu hriattirna hi nimin khan tihchhuah a ni.

AMC chief executive officer M Zohmingthangi'n nimina Samuela hriattirna thupek a chhuahah chuan, "Ni 16.01.2015 hian a hmuna enfiah a ni a, i in chu ṭhiat loin i la sak belh chhunzawm zel avangin, The Mizoram Municipalities Act, 2007 Section 137-in thuneihna a pek angin, AMC hmingin i in sak mek, dan phal loh lai chin chu 25.03.2015 hian ṭhiah a ni dawn a, a senso hi nangma tum tur a ni tih ka rawn hriattir a che," a ti.

AMC CEO tarlan danin, Samuela hi a in sak turah August 17, 2011-ah hian Aizawl Development Authority (ADA) aṭangin permanent building permission pek a ni a, mahse sak phalsak anga a sak loh avangin April 28, 2014-ah insawifiah tura hriattir a ni. Chumi hnuah in sak hna chawlhsan tura hriattir a ni a, mahse thupek chu zâwm loa a sak chhunzawm zela avangin May 27, 2014-ah thawktu, bungrua leh hmanrua hrênsakna order tihchhuah a ni.

Chumi hnuah pawh in chu sak chhunzawm zel a ni a, technical license neitu Jerome T Liansanga chu a inhnûkdâwk zui a, chuvang chuan July 28, 2014-ah in sak chhunzawm lo tura thu pek leh a ni. October 31, 2014-ah phal loh chin ṭhiat tura hriattir a nih hnuah Samuela chuan ṭhiah hun chhung a rawn dil belh a, January 15, 2015 thleng hun pek belh a ni.

Hun pek belh ral hnu, January 16, 2015-a a hmunah AMC thuneitute'n an enfiahnaah, in chu sak chhunzawm zel a ni tih an hmuh avangin, AMC chuan nimin khan Samuela in sak meka phal loh chin ṭhiahna tur thupek a tichhuak ta a ni.