MZP leh Chakma hruaitute an inkâwm CYCA President-in ngaihdam a dil

Saizawh West khuaa Chakma ṭhalaite'n Mizo tlangval kut an thlâk rawn chungchangah MZP hruaitute chuan September 5, Inrinni khan an president B Vanlaltána hoin Chawngteah Central Young Chakma Association (CYCA) hruaitute an kâwm. Thil thleng chungchangah hian CYCA president Dr Joyti Chakma chuan kut tuar chhungte leh Mizo mipui hnenah ngaihdam a díl.

MZP-te chuan, MZP pisa, Chawngte C-ah CYCA hruaitute leh tlawmngai pawl hruaitute an ko khawm a; Chawngteah hian Chakma-te tan curfew an puang nghal.

B Vanlaltana chuan, West Saizawh khuaa Zo hnahthlak awm mekte chu Mizote tan rál hmatáwng leh Mizoram veng himtu an nih thu sawiin, tlawm­ngai pawl hruaitute chu Chakma misualte laka zâm lo a, huaisen taka do let turin a chah a, an thlavang hauh turin Mizo ṭhalai tam tak an awm thu a hrilh.

Saizawh West-a tlawmngai pawl hruaitute chuan, Chakma hoin hmasawnna thilah nasa takin Mizote an thlim thu leh hamṭhatna an pek ṭhat ve duh loh thu an sawi a; Chakma-te'n Chakma Autonomous District Council (CADC) area hnuaia Mizo awmte an hmusit dan leh Mizoram sorkar pawhin CADC huam chhunga Mizo khuate chu ngaihven tura an duh thute an sawi bawk.

MZP hruaitute chuan Saizawh NGO-te nen an inkawm zawhah CYCA hruaitute an kâwm leh a; B Vanlaltana chuan, Mizote'n Mizoram chhunga hnam dangte kut an thlak ngawt ngai loh thu leh an diriam ngawt ngai loh thu sawiin, "Hnam dang Takam, Tuikuk leh vaite zawk hian ram neitute kutthlak a, thisen chhuah mai duh tâwk loin, nunna hial an lâksak ṭhin," a ti.

MZP President chuan, September 3, 2020-ah pawh Chakma ṭhalai 50 chuangin Mizo tlangval, an chenna inah kal chilha an sawisak thu sawiin, "He thil hi MZP chuan a hrethiam ngai dawn lo a, a dem tak zet a ni," a ti a, a ṭul anga sorkar laipuia thlen a nih tur thu a sawi.

MZP thuchhuah tarlan dan­in, CYCA president Dr Joyti Chakma chuan Sawizawh West khuaa thil thleng chu pawi an tih thu a sawi a, "Mizo mipui leh kut tuartu chhungte chungah ngaihdam ka dil e. Pawi khawihtute man a, hrem ngei kan duh. MZP duh dan angin Mizo mipui hnena ngaihdamna dilna kan tichhuak ang," a ti.

MZP hruaitute chuan, CADC chief executive member Rasik Mohan Chakma pawh a inah an hmu a, Chakma ṭhalaite'n an sawisak chu zangnadawmna pe nghal tura an beisei thu an hrilh a; CEM pawhin hliamte chu CADC sorkarin Rs. 50,000 a pek tur thu MZP hruaitute a hrilh nghal a ni.

Hetih lai hian, September 5, Inrinni khan Tlabungah pawh Chakma-te páwna an chhuah an khap nia thu dawn a ni.