PWD-in Mizoramah lei pali dawh mek

Chief minister Lal Thanhawla chuan Dr K Beichhua zawhna chhangin, PWD-in Mizo­ramah lei pali a dawh mek thu a sawi. Lei dawh mekte chu - Chhimtuiluia Darzokai lei, Bairabi Tlawng lei, Tut lei leh Sih­hmui leh Lengpui inkara Tlawng leite a ni.

Chief Minister-in zawhna a chhan danin, Darzokai lei chu S Guha Nyogi & Associates, Kolkata-in an dawh a, sum ruahman zat chu nuai 266.21 a ni. Bai­rabi-a Tlawng lei chu M/s ABCI Infrastructure, Silchar-in dawhin, cheng nuai 612.50 ruahman a ni a; Tut lei dawh nan cheng nuai 795.89 ruahman niin, a dawhtu chu M/s Tantia Constructions an ni. NH-44-A, Sihhmui-Leng­pui inkar Tlawng lei dawh hna thawktu chu M/s Tantia Constructions an ni a, cheng nuai 1313.80 ruahman a ni.

Zawh belhna chhang­in, Lal Thanhawla chuan, nikuma Sihhmui-Leng­pui inkara Tlawng lei chim taa lei kilhna bo vanga PWD-in police-a FIR an thehluhah police-in mi man an la neih loh thu a sawi a; Sihhmui Tlawng lei chim dawh ṭhat nan cheng nuai 47.90 leh hmanrua phurh nan nuai 8.80 hman a nih thu a sawi.

Eptu member-te'n Sihhmui Tlawng lei dawh ṭhat leh tak chu motor lian rit phurin an zawh loh nan a chung lam ft. 11 velah a vâng tan zawngin thîr kham a nih thu an sawi a; hei vang hian bus-te pawhin lei chu an zawh thei lo a, Buichali lamah an kal zel a ngai a, khawthlang lam mipuite'n harsatna an tawh phah hle niin an sawi bawk.