Hmun kilkhawra awm doctor-te Hlawh sang zawk pek tum an ni

Health minister Lal Thanzara chuan, INC member RL Pianmawia zawhna chhangin, Mizoramah primary health centre (PHC) 12-ah doctor an awm lo tih sawiin, "Hmun kilkhawr zawka doctor-te hlawh tihpun tum a ni," a ti.

Lal Thanzara chuan, tun hnaia National Health Mission-a mission director Mizorama rawn zin ṭumin, Chief Minister-in Mizoram mamawhte a lo thlen tih a sawi a, "NHM hnuaia PHC hla zuala thawkte incentive kan dilna chu tihhlawhtlin min tiam a ni," a ti, NHM hnuaia thingtlanga awm tura doctor thawk duh an awm phawt chuan eng zat pawh an lak theih reng thu a sawi.
Health Minister sawi danin, NHM hnuaia doctor thawk, thingtlang hmun kilkhâwr zawka awmte chu thla khatah Rs. 1,00,000 te, Rs. 1,20,000-te hlawh tura ruahmanna siam a ni a; chuta tana project cheng vbc. 187.14 hu an siam tawh chu an tihbelh leh a ni.
Doctor indaihlohna avangin doctor awm lohna PHC-ah doctor dah mai theih an nih loh thu sawiin Lal Thanzara chuan, "Doctor indaih lohna vangin tunah dah mai theih a ni lo a, remchang hmasaah dah dan tur ngaihtuah a ni ang," a ti.
Lal Thanzara chuan, sorkarah doctor an indaih lo hle tih sawiin, "Tun hnaiah a nghetin doctor 27 la mah ila, a tam zawk chu a nghet loa thawk tawh sate an nih avangin doctor kan pun belh vak lo. PHC leh CHC-ah doctor dah vek duh mah ila, kan la tlin rih lo a ni," a ti a; a ṭul zualna hmunah chuan an dah zel tih a sawi.