Jowai-a maxi-cab chesualah Mizo 1 thi

Nimin zing dar 3:30 vel khan Gu­wahati aṭanga Aizawl pana tlan Mizo maxi-cab pakhat chu Meghalaya-a Jowai khaw dáiah a chesual a, Gabriel Zo­dinmawia (28) s/o Biakthanzama, Tui­kual South chu chetsualna hmunah a thi.

Shillong Mizoram House-a depu­ty resident commissioner Jacob Lal­awmpuia hnen aṭanga thu dawn danin, maxi-cab chesuala chuangte hi Mizo Zaimi Inzawmkhawm (MZI), Tuikual Branch member, Guwahati-a hla record-a zin hawte an ni a, maxi-cab pahnihin an inzui a ni.

Maxi-cab hnung zawka tlan chu a chesual a, a hmunah Zodinmawia a thih bakah, mi dang pasarih an hliam. Hliamte chu Jowai Mission Hospital-ah lak an ni a, an zinga pakhat - Yvone Lalmuanpuii chu NEIGRIMS, Shillong-ah lak a ni. Mi dang zawng chu an hliam nat loh avangin nimin khan Aizawlah an rawn haw tlang a; Zodinmawia ruang pawh endik a nih hnuah nimin khan Aizawl rawn panpui a ni.

Jowai-a Mizote'n an buaipui nghal a, Shillong Mizoram House-a deputy resident commissioner leh a thawhpuite'n chetsualna hmun an pan nghal bawk. Shillong YMA ten Zodinmawia kuang an siamsak a ni.