KHAWTHLIR
UNIDO officer
Mizoram sorkar leh UNO thawhhona kal zelah, UN Industrial Development Organisation (UNIDO)-a industrial development officer Frank Hartwitch chuan nimin khan Aizawl a rawn thleng. Sorkar thuchhuah tarlan danin, Frank Hartwitch hian Mizorama industry lam hawia hma thar lakna a ngaihven dawn a ni.
Mi 17-in dawng
Sports minister Zodintluanga chuan MNF member Dr K Beichhua zawhna chhangin, Saiha district aṭangin sport incentive dawng mi 17 an awm tawh thu House a hrilh. Zawh belhna chhangin, Saiha district-ah boxing ring dah a ni tawh a, indoor hall hawn theiha peih ṭêp a nih thu leh, football khelmual puitling tur NBCC-in an thawh mek thu a sawi bawk.
Hmeichhia humhalh
Lunglei DC chuan, hmeichhiate an hnathawhna hmuna an zahawmna tibawrhbáng zawnga chête laka an him theihna atan leh complaint an thehluh theihna turin Internal Complaints Committee a din.
MZU Sports
Mizoram University-a Sports department buatsaih, volleyball, basketball, football, badminton, table tennis leh chess hmanga college hrang hrangte intihsiakna chu Aizawlah neih mek a ni. He intihsiakna hi March 23 khan ṭan a ni a, March 27-ah zawh a ni ang.
Workshop
Directorate of Science & Technology chuan, nimin khan Aijal Club-ah RIPANS-a zirlaite pualin Innovation & Intellectual Property Rights Awareness Workshop an buatsaih a, Planning secretary Dr C Vanlalramsanga'n a hmanpui.
Bike chesualah thi
Thawhṭanni zan dar 8:30 vel khan Rangvamual panna kawng, leivûng paihna bulah bike a chesual a, bike khalhtu Badrasen Chakma (18) s/o Arumoy Chakma, Marpara South chu chetsualna hmunah a thi.