RV leimin then nan Rs. 1,39,97,700 dah

PWD changtu, chief minister Lal Thanhawla chuan, Rangvamuala leimin then nan leh leimin tur venna siamna atan Rs. 1,39,97,700 ruahman a nih thu leh, leimin thiantu contractor chu Tantia Constructions an nih thu House a hrilh.

MNF member Lalruatkima zawhna chhangin, Lal Thanhawl­a chuan, Rangvamuala leimin thenfaina sum chu Disaster management & Rehabilitation department aṭanga hmuh beisei a nih thu sawiin, "Tunah hian sanction nghah mek a ni," a ti a; hna chu February 16, 2015-ah thawh ṭan a ni a, ṭan aṭanga ni 60 chhunga zawh tur a nih thu a sawi.

Leimin then hna thawk tur thlannaah tender chhuah a nih leh nih loh zawhna chhangin, Lal Thanhawla chuan, tender chhuah a nih loh thu a sawi a, "Tender chhuah ila, a thla tél nghah a ngai dawn a, thenfai a hmanhmawhthlak si a, tender chhuah loin hna thawk thei tur contractor kan pe a ni," a ti.

Chief Minister chuan, leimin chhana mawhphurtu ber chu Ramthanmawia, Laipuitlang a ni a, a dawttu chu Lalhnuni, Saron Veng a nih thu a sawi a, "Leimin hi in hmun laitute siam a ni a, inven lâwkna awm loin an lai ringawt a, mipui tan harsatna nasa tak a siam a, sorkarin kan manganpui ta a ni," a ti. Hemi rual hian, Ramthanmawia leh Lalhnuni te chu PWD-in in hmun tur laih an phalsak thu a sawi.

Leimin then leh hna dangte zana thawk loa chhuna thawh a nih chhan zawhna chhangin, CM Lal Thanhawla chuan, "National highway a nih angin truck lianin an zawh tam a, truck-te chu zanah an tlan tam a, zana an tlan theih nan kan hawng a ni. Motor tête chu Sakawrtuichhun lamah an kal thei a ni," a ti.

Lalruatkima chuan, leiminna hmuna lung tlain March 8, 2015 khan Vanlalchhinga (53), Dinthar-II chu a deng fuh a, a hliam tuar loin March 8 zanah a thi zui niin a sawi a; Vanlal­chhinga chu sorkar aṭangin zangnadawmna pe turin a ngen a ni. Chief Minister chuan, "Ka lo en ang a, danah tih theih a ni em tihte en a ngai ang," a ti.