Kawng siamṭhat a ṭulzia ka hre chiang, khaw awm danin a la zir lo - PWD Minister

PWD minister Vanlalhlana chuan, Mizoram hmun hrang hranga kawng chhiatzia leh siamṭhat a ṭulzia a hre chiang a, khaw awm danin a la zir loh avangin siam mai theih a nih loh thu sawiin, mipui hriatthiamna a ngen a; ZPM sorkar hnuaiah Mizoramin hmel thar a hmu chho mek niin a sawi.

Vanlalhlana hian nimin khan ZPM pisaa inkhawmah thu sawiin, "PWD changtu minister ka nih angin tunlaia kawng chhiatzia leh siamṭhat a ṭulzia hi ka hre chiang hle a, department hotute nen ngaihtuahna sêngin ruahmanna pawh kan siam a ni," a ti.

PWD Minister chuan, "Fûr lai a ni a, rem leh rem lo chung pawha kawng chhe siam hna kan thawk chungin a tûk lawkah ruahtuiin min tihchhiatsak leh mai ṭhin. Khaw awm danin a zir miau loh avangin mipui pawhin min hriatthiam ka beisei," a ti a; sorkar hmasa hun laia kawng siamte'n fûr khat pawh a daih lo niin a sawi.

Mizoram kawngte chu PWD enkawl a nih vek loh thu te, NHIDCL-in kawng tam tak an enkawl thu leh BRTF-in kawng ṭhenkhat an enkawl thu sawiin Vanlalhlana chuan, "Kawng chhe siamah beisei anga an chêt chak ṭhin loh avangin PWD hian hma a lak khalh lo thei ṭhin lo a, mipui tan harsatna a thlen kan hlauh ṭhin avangin PWD kan che chhuak vat ṭhin zawk a ni," a ti.

Transport minister Vanlalhlana chuan, Transport department chu sumdawnna lirthei permit pe chhuaktu a nih thu sawiin, "Two wheeler taxi permit pek hi sorkar hmasa hun lai khan politics khelh nan leh mite tihlawm nan an lo hmang ṭhin a ni awm e, keini chuan politics khelh nan hman kan tum ve lo," a ti a; Aizawlah mipui mamawh aia tam two wheeler taxi a awm tawh nia an hriat thu a sawi.

Vanlalhlana chuan, ZPM sorkarin ni 238 chauh hun an la hmang tih sawiin, "Mahse, Mizoramin hmel thar a hmu chho mek. Chief minister Pu Lalduhoma hi mi ṭhenkhatte'n sawichhe ṭhin mah se, a hnung kan zui chhung hian an sawichhiatna leh beihna ang hi a nunah ka la hmu ve lo," a ti.

Sorkarin huaisen takin hma a la mek nia sawiin Vanlalhlana chuan, "Mipui sawisel leh eptu party-te beihna hmachhawn huamin Zoram siamṭhat hna kan thawk mek a ni," a ti a; aikal lak tihtawp chu harsa mah se, a hlawhtlinna hmuh mek a nih thu a sawi.

Vanlalhlana chuan, ration card leh buhfai lak dan chungchang sawiin, "Sorkar kal tawhte'n tih an duh, an tih ngam si lohte kalphung thar mipui sorkarin huaisen takin hma kan la. Eptu party-te'n mipui rilru kaih pên tumin sawi ṭhin mah se, sorkar hmalakna hian harsa zawkte tana phurrit siam a tum lo," a ti. Minister dangte leh ZPM MLA-te pawh mi chhuanawm tak tak an nih thu te, ZPM party-a an hruaitute chu mi chhuanawm leh hmingṭha tak tak an nih thute a sawi bawk.