Police-in two wheeler bengchheng an vâi

Aizawl Traffic Police-te chuan tunlai hian zan lamah Aizawl khawpui chhung hmun hrang hrangah two wheeler silencer/exhaust tihdanglam leh ri bengchhengte an vai ṭhin a, eng emaw zat an man tawh.

Traffic SP Stephen Lalrinawma chuan Vanglaini palai zawhna chhangin, two wheeler-a silencer/exhaust tihdanglam leh ri bengchhengte chu Aizawla hmun hrang hrangah zan lamah an endik ṭhin thu a sawi a, "Hetianga endikna hi hun eng emaw chen kan kalpui tawh a, kan endik zui zel dawn," a ti.

Aizawl Traffic Police tarlan danin, Aizawl khawpui chhung hmun hrang hrangah zan lamah chak leh bengchheng tak taka two wheeler tlân chíng an awm ṭhin tih an hria a, tihtawp tumin hma an la reng a, zan lamah duty an indah ṭhin a ni.

Traffic Police-te chuan, "Hetianga silencer tihdanglam hmang ṭhinte hian mipui harsatna an thlen ṭhin tih hria a, man kher ngai loa dan phal ang bak silencer/exhaust hmang lo turin kan ngen a ni," an ti.