Chhiatna laka fimkhur turin mipui chah

Disaster Management & Rehabilitation secretary K Lalrinzuali chuan September 1, 2024 khan hriattirna tichhuakin, Mizoramah ruah a sur chhunzawm zel dawn nia a lan avangin fimkur turin mi tin a chah.

DMR Secretary chuan, kuminah ruahtui a tlak tam avangin Mizoram hmun hrang hrangah chhiatna a thlen thu a tarlang a, "Kawng hrang hrangin nunphung a tikhaihlak a, heng chhiatna thlengte hi sorkar chuan pawi a tiin, a tuartute pawh a tawrhpui tak zet a, mipui harsatna sukiang tur hian theihtawpin hma a la reng a ni. Khaw chin thlirtu India Meteorological Department (IMD) chuan ruah hi la sûr chhunzawm zel turin a tarlang," a ti.

IMD-in ruahsur chhunzawm zel tura a tarlan avangin fimkur a ṭul thu sawiin DMR Secretary chuan, "Leilung a hnip tawh avang leh chhiatna thleng thut thei hmun hrang hrangah a awm avangin mipuite fimkhur ṭheuh turin kan inngen nawn a. Leimin thei hlauhawm leh chhiatna lian tham thlen thei àwm a awm chuan thuneitute hnenah a rang lama hriattir zel turin kan hriattir a ni," a ti . Kawng hrang hranga harsatna awm theiah an mawhphurhna ṭheuh hlen tura theihtawp chhuah turin sorkar department-te a ngen bawk.