Lengpui Airport mi dang hnena hlan leh hlan loh la ngaihtuah lo

Mizoram sorkar chuan, mi dang hnena Lengpui Airport hlan leh hlan loh zir chian a nih hnuah kalpui zel dan tur a la ngaihtuah lo. Mi dang hnena Lengpui Airport hlan chungchang zir chiangtu committee chuan India Air Force (IAF) hnena hlan a rawt lo nia thu dawn a ni.

Lengpui Airport mi dang hnena hlan leh hlan loh chungchanga rawtna siam tura din Working Committee to Look into the Maintenance and Management of Lengpui Airport chuan August 5, 2024 khan Chief Minister hnenah report an thehlut tawh. Thutlukna siamtu tur chief minister Lalduhoma kaihhruai committee an la ṭhukhawm lo a, USA-a a zin a rawn zin haw hnuah an ṭhutkhawm rin a ni.

January 11, 2024-a CM Lalduhoma hoa ṭhutkhawmnaah India rama airport dangte enkawltu leh an dinhmunte ngaihtuah chungin Lengpui Airport chu AAI hnenah nge, private company hnena hlan ṭha zawk dawn tih te, Mizoram tana hlâwk ber turte kil hrang hranga zir chiang a, khaikhinna chipchiar nei turin committee din rêl a ni a; adviser to chief minister TBC Lalvenchhunga, MLA kaihhruai committee din a ni.

Committee hian kawng hrang hranga an zir chian hnuah an report chu Chief Minister hnenah an thehlut tawh a; Chief Minister hoa la ngaihtuah leh tur a ni.