MPCC-in thu dik lo sawiah CM an puh

Mizoram Pradesh Congress Committee (MPCC) senior vice president Lalnunmawia Chuaungo chuan, tun hnaia Assembly session-ah khan Chief Minister-in CBI hnena general consent pek chungchangah thu dik lo a sawi niin a sawi a, state sorkara thawkte huap tura CBI general consent pek chu state sorkar thuneihna a nih thu a sawi.

Lalnunmawia Chuaungo hian nimin khan Aizawl Press Club-ah thuthar thehdarhtute a kâwm a; ZPM sorkarin December 28, 2023-ah CBI hnenah general consent a pe a, July 1, 2024-ah consent thar a pe leh tih sawiin, "Consent tharah chuan Mizoram sorkar hnuaia thawkte CBI-in a chhui theihna chu hnûk lêtin, state sorkar phalna lak phawt tur tiin sorkar hmasa hun laia mi-ah chiah an kîr. CM-in 'A hmaa mi nen a danglam lo, general consent tho a ni,' tiin ṭang ṭhin mah se, a ṭanna chu a dik lo a ni tih phat rual a nih loh avangin August 21, 2024-a Assembly session-ah a rawn puang ta a ni," a ti.

August 21, 2024-a Assembly session-ah CM-in, 'A hmingah chuan general consent a la ni reng a, amaherawhchu, state employee a huap ta lo a ni. Chu chu keini'n huap rawh se kan ti thei lo a, tu pawh lo sorkar ila kha bak kha kan pe thei lo,' tiin a sawi tih sawiin Lalnunmawia chuan, "State sorkar hnuaia thawkte huap tura CBI hnena general consent pek hi Delhi Special Police Establishment Act, 1946 Section 6 hnuaiah state sorkar thuneihna a ni a, eng dan dang hnuaiah mah khapna a awm lo," a ti a; CM chu thu dik lo hmanga mipui rilru hruai kawi tum tawh lo tura an duh thu a sawi.

MPCC Senior Vice President chuan, Lok-ayukta thuam chak tura sorkar ngenin, "CBI hnenah general consent pek an ngam ta lo a nih pawhin, Mizoram Lokayukta-in state sorkar phalna la kher loa a ṭul a tih huna CBI a hman theih nan consent pe turin kan ngen," a ti a; Lokayukta-in Investigation Wing leh Prosecution Wing a mamawh thu a sawi bawk.

MPCC VICE PRESIDENT THUSAWI DANG

☑ Corruption laka fihlim tura inzuar leh Val Upa Council hmaa thutiam latu ZPM candidate-te chu beiseina sang tak nen mipuite'n hneh takin an thlang tling a, sorkar an siam.

☑ Kum chanve emaw lek rorelna fawng an chelh chhung hian restricted tender lem mai ni loin, MNF sorkar lai pawha hriat lar loh open tender lem, departmental work lem, tender loa qualification leh experience ngai loa work supervisor hminga contract hna pekte social media-ah hmuh tur a tam.

☑ Party mi leh sate duhsak chungchangah sorkar kal ta aia an danglamna hmuh tur a awm lo.

☑ Eirukna chungchanga thuthang hi thu dik a ni mai awm mang e tih theih turin kan CM thusawite leh ZPM sorkar hmalakna a lo awm bawk si hian ngaih a ti ṭha lo.

☑ State sorkar hnuaia hnathawkte huap tura CBI hnena general consent pek hi dan thar Bharatiya Nagrik Suraksha Sanhita emaw, Bharatiya Nyaya Sanhita hnuaiah emaw, eng dan dang hnuaiah mah khapna a awm lo.