Chhungkaw 10 insawn chhuahtir

Minister of state Lalnghinglova Hmar chuan a bial chhung, Vaivakawn Zohnuaia Sangthanmawia in RCC building chhawng sariha sang, September 1, Pathiannia chim chu Pathianni tlai khan a tlawh. In chim bul hnaia chhungkaw 10 chu insawn chhuahtir an ni.

Lalnghinglova Hmar chuan, vanduai-na tawk chhungkua a lainat thu a sawi rualin, thi leh hliam an awm lo chu lawmawm a tih thu a sawi a; khawtlang leh sorkara mawhphurtute hmalakna fakawm a tih thu a sawi bawk.

Aizawl District Disaster Management Authority chairman Lalhriatpuia, bawrhsap leh sorkara thuneitu dangte pawhin in chim hi an tlawh nghal a; khawtlang hruaitute nen hmalak zel dan tur an ruahman. In chimna leh lei chêtna bul hnaia chhungkaw 10 vel chu hmun himah insasengtir an ni a; Zohnuai Primary school pawh ṭhiah tura tih a ni.

In chim avang hian Vaivakawn Zohnuai - Ropaiabâwk inkar kawngah two wheeler chiah tlan tlang theih a ni a, LMV leh a aia liante tlan tlang theih a ni lo. Vaivakawn khawtlang hruaitute tarlan danin, Sangthanmawia in awmna chu kum 2017 velah a che ṭan tawh a ni.