MLA-in Mizoram-Myanmar ramri a tlawh

Champhai South bialtu MLA Lt.Col. Clement Lalhmingthanga chuan August 31, 2024 khan Mizoram leh Myanmar inrina Ṭiau lui kam vel leh Zokhawthar a tlawh a, Customs hotute kâwmin, ramria insumdawn tawnnaa innghatte chu hriatthiamna zau tak nei turin a ngen.

Lt.Col. Clement Lalhmingthanga chuan, Myanmar aṭanga bungraw lak luh khap a nih avangin ramria insumdawn tawnnaa innghat mi tam takin harsatna an tawh chungchang Customs hotute a sawipui a; sorkarin bungrua a khap bâk chu ni tin mimal eizawnna leh châkkhai zualpui lak luh chungchangah leh bungraw phura la lut tu inhlawhfate chu hriatthiamna nena lo en turin a ngen a ni.

Mizoram sorkarin Indo-Myanmar border trade a ngaih pawimawh thu leh tihchangtlun nan hma a lak zel thu sawiin Clement Lalhmingthanga chuan, "Zokhawthara border trade kaltlanga insumdawn tawnna hmun khâr mek a awm chungchangah, ramri behchhana ni tina eizawngtute'n harsatna an tawh loh nan ngaihtuahna sen a ṭul a ni," a ti.

Myanmar aṭanga Mizorama bungraw lak luhna kawng pui ber Tahan-Teddim kawnga Rûn lui lei chu June 8, 2024 khan Myanmar sipaite'n bomb hmangin an tichhia a, hei vang hian bungruate chu kawng hla zawk, Falam lam kawngah lak a ngai tawh a, Khawmawi leh Zokhawtharah bungraw lut nasa takin a tlem phah a ni. Bungraw lak luh chhunte a man a san phah bawk.

Khawmawi-Zokhawthar inkar Ṭiau lui kâna bungraw lak luhte phur, hlàn kai leh hlàn thlâka inhlawh ṭhin Zokhawtharah mi tam tak an awm a; bungraw lut a tlem avangin mi 700 velin thawh tur an neih mumal loh phah nia sawi a ni.