Poshan Maah hman ṭan a ni

Directorate of Women & Child Development buatsaihin Social Welfare, Tribal Affairs, Women & Child Development secretary Lalzarmawii chuan nimin khan Women & Child Deve-lopment pisaah Poshan Maah (Nutrition Month) a hawng. Nutrition Month hi September thla chhung kalpui tur a ni.

Poshan Maah hi Rashtriya Poshan Abhiyan hnuaiah kalpui a ni a; thupui 'Overall nutrition' hnuaiah hmalakna tur theme hrang hrang - anaemia (thisen tlakchhamna beih kawnga test rûnpui), growth monitoring (ṭhan dan endik rûnpui), complementary feeding (nau chaw hrai dan), poshan bhi padhai bhi (chaw ṭha pe la zirtir rawh) leh technology for better governance, transparency and efficient service delivery-te a awm a ni.

Lalzarmawii chuan, Poshan Maah hman turah lungrual tak leh theihtawp chhuaha hma la turin WCD-a thawkte leh department dang thawhpuite a sáwm a; Poshan Maah 2024 kalpui tur chu ram hriselna atana hmasawnna rahbi pawimawh a nih ngei a beisei thu leh, hriselna, hmasawnna leh changkanna chu department kutah thui tak a innghah thu a sawi.