Serchhipah quick response team din

Disaster Management & Rehabilitation department leh Serchhip District Disaster Management Authority chuan nimin khan Serchhip DC conference hall-ah chhiatna thlenga chhanchhuah hna thawktu tur quick response team (QRT)-te tan training an buatsaih.

Training hawngtu DMR joint director Malsawmtluanga chuan, district tinah ṭha taka QRT kalpui tura hmalak mek a nih thu leh Serchhip chu Aizawl pawna mumal taka QRT nei hmasa tur an nih thu a sawi a, "Mi dang entawn tlaka in awm a ngai dawn a, mi dang aia rintlak leh hma hruaitu ni turin inbuatsaih ang che u," a ti.

DMR deputy director Lalrokima Chenkual chuan, kum 2019 khan district zawng zawngah QRT din vek tura rêl a nih thu sawiin, "QRT member turte hi anmahni inpekna mai bakah, an chhungte remtihna nen thlapa tih ni se kan duh a, chhanchhuah hna an thawh laiin hliam ve thei an nih avangin sorkar aṭangin zangnadawmnate pawh buatsaih a ni," a ti a; QRT member-te chu district lama DMR hotute'n insurance tihsak se an duh thu a sawi.