Sikul naupang ipte rit chungchang sawiho

Lunglei district bawrhsap R Lalṭhazuala kaihhruaiin nimin khan sikul naupangte sikul ipte (bag) rit lutuk vanga zirlaite'n harsatna an tawh loh nana hmalak dan tur sawiho a ni a; sorkar hotu te, tlawmngai pawl, zirlai pawl leh zirtirtu pawl hruaitute leh mimal leh kohhran sikul aiawhte an tel.

Lunglei DC chuan, Mizoram sorkarin sikul naupang inte rit lutuk chhâwk zângkhaina tur inkaihhruaina April 30, 2021-ah a tihchhuah thu a sawi a, "Lunglei district-ah a theih chin chinah bawhzui a ni. Naupangte hi zirna ṭha pek ngawr ngawr piah lamah, an sikul iptê rit lutukin an hriselna a nghawng thei em tihte ngaihtuah a, naupangte ṭánghma atan ruahmanna siam a pawimawh," a ti.

Ṭhutkhawmah hian inte rit lutuk nena ni tina sikul kal ṭhin naupangte hriselnain a tawrh theih dan tarlan niin, zângkhai zawka kalpui dan tur sawiho a ni a; sikul tinah zirlaite'n tui in tur thianghlim hnianghnâra an neih theih nan ruahmanna siam ni se, an ti. Sikul exam term khata zir tur ang zela zirlaibu siam chungchang SCERT-ah thlen an rêl bawk.