KHAWTHLIR

E-roll training

Special Summary Revision of Electoral Roll 2025 atana inbuatsaih nan nimin khan Aizawl DC conference hall-ah Aizawl district-a ERO leh AERO-te pualin training buatsaih a ni a, Aizawl district election officer Lalhriatpuia, bawrhsapin a hawng. Electoral roll ennawn turah hian January 1, 2025-a kum 18 tling chin ziah luh theih a ni dawn a; October 29, 2024-ah draft roll tlangzarh a ni dawn a, October 29 - November 28, 2024 chhungin dilna thehluh theih a ni ang. January 6, 2025-ah final roll tlangzarh tum a ni.

PMMSY dilna pawm

Saitualah District Committee on Centrally Sponsored Scheme chu nimin khan district bawrhsap Dr Lalngura Tlau hoin DC conference room-ah an ṭhukhawm a, Pradhan Mantri Matsya Sampada Yojana (PMSSY) chungchang an rêl. PMMSY hnuaia kum 2023-24 atana sangha dil siam ṭanpui dilna 482 zinga mi 25 thlante pawm a ni.

Tui ren turin ngen

Mamita PHE Executive Engineer chuan, tun hnaia ruahsur vanga tuilianin Mamit tui lakna hnâr pahnih a tihchhiat thu te, gravity pipeline eng emaw zat a lâk bo thu leh, leimin avangin Phaizau-Mamit pipe lian hmun pakhatah a bun thute a tarlang. "Tui sem hun tur sawi lâwk theih a ni lo a, mipuite tui ren tur leh ruah tui khawl ṭha turin kan inngen a ni," a ti.

ZMC-ah MPH zirna

Zoram Medical College-ah Master of Public Health (MPH) zirna hawn a ni dawn. Sorkar thuchhuah tarlan danin, ZMC-ah hian MPH zirna hi Mizoram University (MZU)-in a phalsak anga hawn tur a ni a, Mizorama MPH zirna hmasa ber tur a ni. Kum 2 chhung zir tur a ni a, seat paruk a awm.

Assam type in chim

Nimin tlai/zan dar 6 vel khan Republic Veng, Aizawlah Assam type in pakhat a chim a, thi leh hliam an awm lo. Thu dawn danin, in chim hi Chhingpuii chenna a ni a, amaha khawsa a ni. In a him lo tih hriat a nih avangin a bungruate thiar chhuahtir a ni a, bungraw thiar chhuah zawh hmain a chim a ni.