Awm duh lohna neih vanduaithlak ti

Health minister Lal Thanzara chuan, sorkar hnathawk ṭhenkhat awm duh lohna leh thawh duhna bik nei an awm ṭhin chu vanduaithlak a tih thu a sawi.

Health department-a medical officer atana lak thar doctor 27-te puala Aizawl Civil Hospital conference hall-a training-ah thu sawiin Health Minister chuan, "Sorkarin kawng hrang hranga mipui rawngbawl leh ṭanpui tura a lak nih hre reng chunga sorkarin a dahna hmuna thu âwih taka awm leh ṭha taka mawhphurhna kan hlen chhuah hi kan tihmâkmawh a ni tih kan hriat nawn fo a ṭul,” a ti.

Lal Thanzara chuan, doctor lak tharte chu an hna thar ataa duhsakna a hlan a; Pathianin missionary ni tura hna a pek a ni tih leh damlote tana malsawmna ni tura a dah an ni tih hria a, inpekna thûk tak nen ṭanpui ngaite ṭanpui leh enkawl turin a fuih.

Training hi Health principal director Dr K Ropari’n a kaihruai a, Health department hotu dangte pawh an tel a ni.