Illiteracy survey nei turte tan training

School Education department chuan nimin khan Govt. Aizawl College conference hall-ah ziak leh chhiar thiam lote zawn chhuahna, illiteracy survey a neih tura veng leh khaw tina mawh­phurtu tur zirtirtu thlante leh SSA-a BRC leh CRC coordinator te tan kalhmang inhrilhfiahna hun an buatsaih.

Training hi Aizawl East SDEO Lalram­thianghlima’n a kaih­hruai a, School Edu­cation director K Lal­thawmmawia khuallian a ni. Illiteracy Survey hi kum sarih chin chunglam, ziak leh chhiar thiam lote zawn chhuahna tur a ni.

K Lalthawmmawia chuan, School Education hmalakna zinga pawimawh tak mai chu literacy rate tihsan a nih thu sawiin, “Ramin hma a sawn dawn chuan ziak leh chhiar thiam danin a hril hle ṭhin. Mizoramah chuan Aizawl district hi ziak leh chhiar thiam tam lamah pahnihna a ni a, ziak leh chhiar thiam lo mi tlemtê zawng chhuak a, ziak leh chhiar thiamtir turin ṭhahnemngai taka thawh a pawimawh,” a ti.