Dental surgeon leh hygienist lak sawifiah

Health minister Lal Thanzara chuan Lalruatkima zawhna chhangin, National Oral health Programme (NOHP) hnuaiah dental surgeon pahnih leh dental hygienist pahnih lak an nih thu House a hrilh a; January 27, 2015-ah appointment pek a nih thu a sawi.

Zawhna neitu Lalruatkima chuan, NOHP hnuaia dental surgeon leh dental hygienist lakna tur hian Vanglaini chanchinbu-ah advertisement tihchhuah a ni a; mahse February 1-2, 2015-a advertisement tihdikna (corrigendum) tihchhuah lehah chuan qualification tarlan a awm tawh mang lo niin a sawi.

Health Minister chuan, dental surgeon leh dental hygienist lakte chu kum khat chhung contract-a thawk tur an nih thu sawiin, "Senior zawkte'n min rawn chhuahchhâl a, department lam ka zawt fiah a, department lamin kan tihsual a ni, an ti a, chuvang chuan tihṭhat leh a ni," a ti a; NHM hnuaia contract-a thawk turte chu advertisement chhuah lo pawhin lak theih a nih thu a sawi.