FCI atangin buhfai buk tling ngei pe chhuak Buhfaiah hlauhthawn tur a awm lo - Rajya Sabha MP

Food Corporation of India (FCI) State Consultation Committee chairman Ronald Sapa Tlau, Rajya Sabha MP chuan, fûr lai ni mah se, Mizoram tan buhfaiah hlauhthawn tur a awm loh thu a sawi a; FCI kudam aṭanga buhfai an pek chhuahte chu buk tling ngei an nih thu a sawi.

Ronald Sapa Tlau hian nimin khan Hotel Regency-ah thuthar thehdarhtute a kâwm a; FCI-in Mizorama buhfai a dah khawl dinhmun sawiin, "FCI hian Mizoramah buhfai metric ton 25,490 a chhêk khawl thei a, tun dinhmunah buhfai metric ton 5,344 chhêk khawl a ni. Mahse, buhfai lo thleng leh mai tur eng emaw zat a awm avangin hlauhthawn tur a awm lo," a ti.

Rajya Sabha MP sawi danin, July 17, 2016 hian Mizoramah rél hmangin buhfai metric ton 3,300 a lo thleng dawn a, July 20-ah metric ton 2,000 a thleng leh ang. Hei bakah hian, truck hmangin Assam aṭangin buhfai eng emaw zat a thleng bawk dawn a ni.

Fûr chhunga Mizoramin buhfai a mamawh chu metric ton 9,000 vel a nih thu sawiin Ronald Sapa chuan, "Bairabi-ah rél lian hmanga buhfai phurh luh zung zung theih a ni tawh avangin hlauhthawh tur a awm tawh lo. Mizoramin buhfaiah harsatna a tawh loh nan theihtawp kan chhuah zel dawn," a ti.

Ramrikawna FCI kudam chu sawn chhuah vat an duh tih sawiin Ronald Sapa chuan, "Hnawksak renga awm hi kan ning ve tho. A sawnna tura tih Sihhmui ramah harsatna a awm an ti a, mahse, tihdan kan ngaihtuah zel. Sihhmui ram hi a rem ngang lo a nih pawhin Nghalchawm ramah hmun a awm," a ti.

Ronald Sapa Tlau chuan, FCI kudam
aṭangin buhfai bûk tling ngei pek chhuah zel tum a nih thu sawiin, "Kan hotute'n buhfai bûk tling ngei pek chhuah an intiam tawh a, hei hi tihhlawhtlin zel kan tum," a ti a; FCI kudam
aṭanga buhfai pek chhuahte chu bûk tlin leh tlin loh finfiah vek ṭhin a nih thu a sawi.

FCI Consultation Committee chair-man chuan, Mizoram sorkarin mimal hnen aṭangin buhfai FCI aia man tlawm zawka an lei ṭhin avangin FCI-in buhfai an chhêk khawl ṭhat ngam loh
ṭhin thu sawiin, "Kan chhêk khawlte a chhe mai ang tih kan hlau ṭhin," a ti a; tun hnaiah local supplier-in a supply ṭhat loh avangin Mizoram sorkarin FCIi aṭanga buhfai a lei leh tâk thu a sawi.

Zawhna chhangin Rajya Sabha MP
ṭawiawmtu FCSCA director R Lalramnghaka chuan, local supplier aṭanga buhfai lei tho a la nih thu sawiin, "Tun hnaiah rel kawng velah harsatna a awm avangin duh angin a supply ṭha thei lo a ni," a ti.

FCSCA Director sawi danin, buhfai supply tur zawnna atana tender an chhuah chu mi 20-in an chhang a, an zinga chháng hniam ber thlan a ni. A chháng hniam berin a chhànna chu quintal khat Rs. 2,298 a ni a, a hmaa local supplier-in a chhanna rate Rs. 2,575 aiin Rs. 277-in a hniam zawk.

Rajya Sabha MP chuan zawhna chhangin, local supplier-te'n buhfai an lakna chu an chhui chiang a, mahse, an lakna hmun tak an hriat chhuah theih loh thu a sawi.