Lei thuam chak hna zo fel

Mizoram sorkar chuan thuchhuah siamin, NH-154 Bairabi khaw bula Kawnpui luia bailey bridge thawm ṭhat hna chu nimin khan zawh a ni a, hlawhtling taka enchhin nghal a nih thu a tarlang.

Sorkar thuchhuah tarlan danin, Kawnpui lui bailey bridge hi kum 1988-ah dawh a ni a, ft. 130-a sei a ni. A tirah metric ton 20 rit phur lirthei zawh thei tura duan a ni a, kum 2014 khan ṭha taka thawm ṭhat a ni. Motor qtl. 300-400 phur theite Mizoram kawngpuiah an tlan tak avang leh lei chu Bairabi rél chawlhhmun aṭanga Mizoram hmun hrang hranga buhfai phurh chhuahna kawng a nih avangin tun hnai khan thuam chak a ni.

Lei hi metric ton 30 phur zawh theih tura thuam chak a ni a, thuam chak hna hi July 4, 2016-ah ṭan niin, July 13 khan zawh a ni.