Gas bûk tling chauh sem tur

Sorkar thuchhuah chuan, eirawng-bawlna gas bûr bûk tling ngei chauh gas distributor-te'n an hralh tur a nih thu a tarlang a, "Gas cylinder-te hi consumer-te hmuh lai ngeia bûk tur a ni," a ti.

Thupek chhuah hi FCSCA, Police leh IPR department-te DC leh SP te, Central YMA leh pawl dangte June 28, 2016-a ṭhukhawm thutlukna angin gas bûk tling lo leh tihchingpen chungchanga thutlukna anga tih a ni.

Gas bûrte chu distributor-te'n IOC aṭanga an dawn rualin an bûk vek tur a ni a, a bûk tling lote chu return challan felfai taka siamin transporter-te kaltlangin IOC-ah thawn kîr nghal tur a ni. Gas bûk tlingte chauh consumer-te hnenah hralh tur a ni a, distribution point-a gas sem chu local council leh village council-te'n an lo buaipui ang a, YMA branch/section ten an enpui bawk ang.

Gas sem hun tur pawh mipuite'n an hriat theih nan distributor-te'n L/C, V/C leh YMA branch-te an hriattir ṭhin tur a ni a; distribution point-a gas sem dan kimchang chu distributor-te'n nitin FCSCA department-ah an thehlut tur a ni bawk. He thupek hi July 4, 2016-ah hman ṭan a ni a, thu leh a awm hma chuan hman tur a ni.