RMSA hnathawh dan tur sawiho

Rashtriya Madhyamik Shiksha Abhiyan (RMSA)-a district prog-ramme coordinator (DPC)-te chu, nimin khan School Education director K Lalthawmmawia hoin School Education directorate conference hall-ah an ṭhukhawm a; kum 2016-17 atana Project Approval Board-in a pawmpui tawh hna thawh dan tur an sawiho.

K Lalthawmmawia chuan, RMSA Project Work-ah a huna thawh ngai leh tih ngai a awm ṭhin tih sawiin, "A huna tih hman loh chuan sum kan hmuh turin a tuar a, hun kal tawhah kan vuaichâ deuh vanga harsatna kan neihte a awm. Kuminah chuan a hun takah engkim kalpui tur a ni," a ti.

Meeting-ah hian kum 2016-17 atana PAB-in a pawmpui tawh hna thawh dan tur sawiho a ni a; PAB-in Mizoram RMSA tana sum a pawmpui tawh chu cheng nuai 3206.68 a ni a, hetah hian kum hmasaa sum hman loh, kumin atana dah (spill over) a tel lo.