KHAWTHLIR

CM a zin

Chief minister Lal Thanhawla chuan nimin khan Guwahati a pan a, vawiinah Shillong-a Nadi Festival-ah a tel ang. Festival zawhah Delhi a pan ang a, July 16-ah Rashtrapati Bhavan-a prime minister Narendra Modi hoa Inter State Council Meeting neih turah a tel ang.

Mei zu 17 man

Aizawl district Anti Tobacco Squad chuan, nimin khan New Market leh a chhehvelah squad drive an nei a, phal lohna hmuna mei zu mi 17 man-in, pawisa an chawitir.

Mock drill

Lunglei district-a police-te chuan, nimin khan Lunglei SP pisaah kângmei laka inven dan zir lâwkna 'mock drill' an buatsaih a, kângmei a chhuah thulha chêt dan leh chhanchhuah hna thawh dan tur chi hrang hrang an entir.

Zu rûi 24 man

Excise & Narcotics department chuan, June 2016 chhung khan zu zuar 46 leh zu rûi 24 an man a; rakzu litre 1169.55, zu bilhlai ṭin 1,995, sap zu (ûm puitling) ûm 538 leh zu kaihhnawiah lirthei pakhat an man bawk.

Sorkarin rál

Aizawl DC chuan July 12, 2016 khan hriattirna chhuahin, March 31, 2016-a Tlungvel dái quarry-a lung tlain a delh hlum, Judith Lalremkimi d/o PC Lalnunthara, Tlungvel Venghlun ralna atan sorkarin Rs. 4,00,000 a pe. Sum hi State Disaster Response Force hnuaia Calamity Relief Fund aṭanga pek chhuah a ni.

NLUP sem

Agriculture dept. chuan nimin khan an Tuirial constituency huam chhunga an department hnuaia NLUP thlangtute hnenah ṭanpuin sum an sem a, bialtu MLA Hmingdailova Khiangte-in a hman pui. Ṭanpuina hi mi 116 hnenah sem a ni a, sum sem zat chu cheng nuai 23.8 a ni.

Lusun khawhar

Roman Catholic puithiam, Father Augustine CL Biaksanga chu nimin zing khan Aizawl Hospital-ah a boral a; nimin tlai khan Aizawl Bishop Most Rev. Stephen Rotluanga'n Bishop's House, Ramthar Vengah a vui.