AMC-in a duhsak zawngte a thlan vangin Kum khatah Rs.32,21,040 a hloh - PRISM

PRISM chuan, Aizawl Municipal Corporation (AMC)-in kum 2016-17 chhunga Aizawla motor parking fee khawn tur an thlan-naah, a chhang sang berte thlang loa an duhsak zawngte an thlan avangin kum khat chhungin Rs. 32,21,040 a hloh dawn niin an sawi.

PRISM hruaitute hian nimin khan Aizawl Press Club-ah thuthar thehdarhtute an kâwm a, AMC-in parking fee khawn tur an thlan chungchang an sawifiah. "Parking fee khawnna tura dik lo taka a chháng hniam zawk an lakna area-ahte hian a chháng sang zawk la leh ngei turin kan phût," an ti.

PRISM president Vanlalruata chuan, AMC chu mipui lung tiawi lo khawpa sum hmuhna tura ṭhahnem an ngaih ṭhin laiin, mi an duhsak theihnaah chuan sum hloh pawi ti loah a puh a, "Thuneitute duhsak zawngte siam len tumna vangin an sum hmuh theih tur cheng nuai 32 chuang an chán dawn a ni," a ti.

Vanlalruata sawi danin, AMC-in kum 2016-17 chhunga Aizawla parking fee khawn tur thlanna turah mi 352-in tender an chhang a, chu'ng zinga pakuate chu an chhannaah area number ziah lan loh vangin an hnâwl. Chumi hnuah chhànna 95 an hnâwl lehin, chhanna nung 248 a awm. Parking fee khawnna tur area 58 a awm a, area pahnihah chhangtu an awm lo.

AMC chuan tender chhanna nunga an pawm 248 aṭangin, Aizawla parking area 56 zinga 34 (60.71%)-ah a chháng sang ber ni lo parking fee khawn turin an thlang a; area 24 (42.85%)-ah phei chuan a chháng hniam ber hnenah pek a ni.

PRISM President chuan, AMC chu sum hmuhna turah ṭhahnem a ngai em em a, in sak phalna lak nan ringawt sum tam tak sen a ngaih lai leh Property Tax pawh mi tam tak tana phurrit ni khawpa an khawn laiin, parking fee-ah mi tute emaw an duhsak vangin kum khatah Rs. 32,21,040 an hloh dawn tih a sawi a, "Mipui zah lohna leh dan palzûtna nasa takah kan ngai," a ti.

PRISM-in RTI Act hmanga an zawhna AMC-in a chhan danin, area pakhatah chuan Rs. 1,00,070-a chhánte pawh an awm laiin, a chháng hniam ber leh reserved price-a chhangtu C Laldingliana, Armed Veng South (Rs. 40,000) chu thlan a ni. A chhang sang ber leh AMC-in an thlan takte chhanna in-thlauhna hi Rs. 60,070 a ni.

Chhannaa a lan danin, Aizawla parking area tam tak zingah, parking fee khawn tura thlan tâkte chhanna aia a chháng sang berte chhànna inthlauhna tam zualte chu - Rs. 60,070, Rs. 46,800, Rs. 32,000, Rs. 30,900, Rs. 18,000, Rs. 13,000, Rs. 10,300-te a ni a; a inthlauhna Rs. 10,000 chin chung lam hi hmun pariatah a awm a ni.